سوشل میڈیا پر بجلی کے بڑھتے بلوں کا چرچا

پاکستان میں معاشی مراعات

مخصوص مراعات کا سراغ لگنا مشکل ضرور ہے، لیکن پاکستان میں معاشی مراعات کا مجموعی تخمینہ موجود ہے۔

اقوامِ متحدہ کے ترقیاتی پروگرام اور نیشنل ہیومن ڈولپمنٹ کی جانب سے 2021 میں شائع ہونے والی ایک مشترکہ رپورٹ میں بیان کیا گیا ہے کہ کیسے پاکستان کے امرا، جاگیردار، سیاسی قائدین اور فوج کو ملنے والے معاشی مراعات پاکستان کی معیشت میں 17 ارب ڈالر سے زیادہ کا اضافی خرچے کا باعث بنتے ہیں۔

پاکستان انسٹیٹیوٹ آف ڈیویلپمنٹ اکنامکس (پائیڈ) اور اقوامِ متحدہ کی رپورٹ کے جائزے سے معلوم ہوتا ہے کہ پاکستان کے مختلف اداروں کے افسران کو اکثر ماہانہ تنخواہ کے ساتھ کئی مراعات ملتی ہیں جن میں مفت بجلی بھی شامل ہے۔

رپورٹ کے مطابق عدلیہ کے ایک ہائی کورٹ کے جج کو اپنی ملازمت کے دوران مفت گھر ملتا ہے، جس کا کرایہ حکومت دیتی ہے جبکہ بجلی کا بِل اور سرکاری گاڑی بھی حکومتی کھاتے میں آتے ہیں۔

پائیڈ کی رپورٹ کے مطابق اگر جج اپنے گھر میں رہتے ہیں تو ان کے گھر کا اضافی خرچہ، جو دستاویزات میں تقریباً 65 ہزار روپے ماہانہ رقم بتائی جاتی ہے، مختص کردی جاتی ہے۔

اور اس کے علاوہ دیگر اخراجات بھی اسی کھاتے میں ’اضافی‘ کے نام سے شامل کر دیے جاتے ہیں جو حکومت بھرتی ہے۔

پائیڈ کی رپورٹ کے مطابق اسی طرح بجلی کے اداروں میں کام کرنے والے اعلیٰ افسران کو مفت بجلی دی جاتی ہے۔ جبکہ اس کے علاوہ مفت ٹیلیفون، مفت پٹرول اور مفت گھر بھی دیا جاتا ہے۔

اسی رپورٹ میں کہا گیا ہے کہ پاکستان کے چیف آف آرمی سٹاف، کور کمانڈرز اور فوج کے دیگر اعلیٰ افسران کو بھی گھر، بجلی اور گاڑیوں جیسی آسائشیں دی جاتی ہیں، جن کو پاکستان کے قوانین میں تحفظ فراہم کیا گیا ہے۔

واضح رہے کہ مارچ کے مہینے میں پبلک اکاوئنٹس کمیٹی کی ایک اجلاس میں پاور ڈویژن کو 16 سے 22 گریڈ کے سرکاری افسران کو مفت بجلی کی سہولت ختم کرنے کی تاکید کرتے ہوئے کمیٹی چیئرمین نور عالم خان نے کہا تھا کہ اس اقدام سے سالانہ نو ارب روپے کی بچت ہو گی تاہم اس تجویز پر عمل نہیں ہو سکا۔

’اصلاحات کے بجائے مذید مراعات کے حصول پر توجہ دی گئی‘

بی بی سی سے بات کرتے ہوئے ندیم الحق نے کہا کہ ’پاکستان کی انتظامی مشینری کو اگر دیکھا جائے، خاص طور سے اس کی بیوروکریسی کو، تو اس پر برطانوی راج کی واضح چھاپ ہے۔‘

وہ کہتے ہیں کہ ’آج تک پاکستان میں 29 کمیشن بنائے گئے ہیں تاکہ ایک واضح ڈھانچہ تشکیل دیا جا سکے اور خرچے کم کیے جاسکیں۔ یہ تمام تر ڈھانچے ناکام ہوئے کیونکہ ریفارم لانے کے بجائے زیادہ تر توجہ مزید مراعات اور آسائشوں کے حصول میں صرف کی گئی۔‘

لیکن ایک سوال یہ بھی ہے کہ پاکستان کے بڑے اداروں کے افسران کو ملنے والی مفت بجلی اور دیگر آسائشوں کو کم کرنے سے کیا فرق پڑے گا تو اس کا جواب ملک کی معاشی صورتحال پر رپورٹنگ کرنے والے صحافی شہباز رانا نے کچھ یوں دیا کہ ’ایسے وقت میں جب پاکستان کے پہلے سے غریب طبقے پر بوجھ ڈالا جارہا ہے، ان حالات میں یہ لازم ہے کہ ان اداروں پر سوال اٹھایا جائے جن کو مفت آسائشیں دی جارہی ہیں کہ انھیں یہ آسائشیں مفت کیوں ملیں؟‘

اسی طرح لاہور سے تعلق رکھنے والے سماجی کارکن رضوان الحق نے بی بی سی سے بات کرتے ہوئے کہا کہ ’آئی ایم ایف کی شرائط نہ ہوتیں تو یہ بھی نہیں پتا چلنا تھا کہ کس کو کیا ملتا ہے۔ یہ بات صرف بجلی کی آسائش ملنے تک محدود نہیں ہے بلکہ اس سوال پر ہے کہ یہ مفت آسائش ملنے کا آخر جواز کیا ہے؟ فائدہ ہونا یا نہ ہونا ایک بڑی بحث کا حصہ ہے۔‘

شہباز رانا نے کہا کہ ’یہ آئی ایم ایف کی بات نہیں ہے بلکہ اگر پاکستانی معاشرے کو امیر طبقے کی جکڑ سے نکالنا ہے تو یہ سوال پوچھنا اور ایسے اقدام کرنا جن سے ان کو بھی بِل بھرنے کا موقع دیا جائے ضروری ہیں۔‘