سینیٹ چیئرمین کی تنخواہ اور مراعات

پاکستان کے ایوان بالا یعنی سینیٹ کے چیئرمین اور ڈپٹی چیئرمین کے علاوہ سینیٹ کے ارکان کی تنخواہوں اور مراعات کے اضافے کا بل سینیٹ سے منظور ہونے کے بعد حکمران اتحاد میں شامل دو بڑی جماعتوں کا کہنا ہے کہ اس بل کو کبھی بھی قانون کا حصہ نہیں بننے دیا جائے گا اور جب یہ بل قومی اسمبلی میں پیش ہوگا تو اس کی بھرپور مخالفت کی جائے گی۔

دستور کے مطابق سینیٹ سے پاس ہونے کا بل منظوری کے لیے قومی اسمبلی میں بھیجا جائے گا اور اگر قومی اسمبلی اس کو یکسر مسترد کردیتی ہے تو پھر یہ قانون کا درجہ حاصل نہیں کرتا اور اگر قومی اسمبلی کے ارکان اس بل میں کچھ ترامیم تجویز کرتے ہیں تو پھر یہ بل دوبارہ غور کے لیے سینیٹ میں بھیجا جائے گا۔

ان دو بڑی جماعتوں میں پاکستان مسلم لیگ نواز اور پاکستان پیپلز پارٹی شامل ہیں اور دلچسپ امر یہ ہے کہ چند روز قبل چیئرمین، ڈپٹی چیئرمین اور سینیٹ کے ارکان کی تنخواہوں اور مراعات میں اضافے کا یہ بل جب سینیٹ سے منظور ہوا تھا تو اس بل کو پیش کرنے اور اس کو پاس کروانے میں بھی ان دونوں جماعتوں کے ارکان کی اکثریت شامل تھی۔

سینیٹ کے سابق ڈپٹی چیئرمین اور سینیٹ میں پاکستان پیپلز پارٹی کے چیف وہیپ سلیم مانڈوی والا کا کہنا ہے کہ ان کی جماعت کی قیادت سینیٹ میں اس بل کے پاس ہونے پر سخت نالاں ہے اور انھوں نے اس بل کے پاس ہونے پر ناراضی کا اظہار کیا ہے۔

بی بی سی سے بات کرتے ہوئے انھوں نے کہا کہ سینیٹ سے اس بل کے پاس ہونے کے بعد پاکستان پیپلز پارٹی کے شریک چیئرمین آصف علی زرداری نے انھیں طلب کیا اور انھیں ڈانٹ پلائی کہ کیسے سینیٹ کے چیئرمین کی مراعات میں اضافے کا بل پاس کروایا گیا۔

سلیم مانڈوی والا کے بقول انھوں نے سابق صدر کو بتایا کہ چونکہ وہ بجٹ کے معامالات کو دیکھ رہے تھے اس لیے وہ اس پر توجہ نہیں دے سکے۔

انھوں نے کہا کہ اس بل کو منظور کراونے میں حتیٰ کہ ان کے پارٹی کے ارکان نے بھی انھیں اعتماد میں نہیں لیا۔

واضح رہے کہ اس بل کو پیش کرنے اور اس کو پاس کروانے میں سینیٹ کے دو سابق چیئرمین رضا ربانی اور فاورق ایچ نائیک شامل ہیں اور دونوں کا تعلق پاکستان پیپلز پارٹی سے ہے۔

اقتصادی بحران میں مراعات کیسے دی جا سکتی ہیں؟

سلیم مانڈوری والا کا کہنا تھا کہ ملک مشکل حالات میں ہے اور حکومت نے پاس سیلاب متاثرین کی امداد کے لیے پیسے نہیں جبکہ دوسری جانب سینیٹ کے چیئرمین اور ارکان کے تنخواہوں کے بل منظور کیے جا رہے ہیں۔

پاکستان مسلم لیگ نون کے سینیئر اور وزیر مملکت برائے پیٹرولیم مصدق ملک کا کہنا ہے کہ وہ یہ معاملہ وزیر اعظم کے نوٹس میں بھی لے کر آئے ہیں اور انھوں نے اس پر برہمی کا اظہار کیا ہے۔

انھوں نے کہا کہ پارٹی کی سینیئر قیادت کو بھی اس بل پر تحفظات ہیں جس کا انھوں نے اظہار بھی کیا۔

بی بی سی سے بات کرتے ہوئے انھوں نے کہا کہ ملک اس وقت جن مسائل سے گزر رہا ہے تو ایسے حالات میں اس قسم کی مراعات کیسے دی جاسکتی ہیں۔ انھوں نے کہا کہ کسی صورت میں بھی اس بل کو قانون بننے نہیں دیا جائے گا۔

بعدازاں ایک نجی ٹی وی چینل سے گفتگو کرتے ہوئے مصدق ملک کا کہنا تھا کہ جب سے پی ڈی ایم اور پاکستان پیپلز پارٹی اقتدار میں آئے ہیں اس وقت سے وزیر اعظم نے یہ اعلان کر رکھا ہے کہ کوئی بھی وزیر تنخواہ اور مراعات نہیں لے گا اور وزیر اعظم کے احکامات کی روشنی میں تمام وزرا اکانومی کلاس میں سفر کرتے ہیں جبکہ دوسری طرف چیئرمین سینیٹ کے لیے چارٹر طیارے تک بک کروانے کے بل کی منظوری دی جا رہی ہے۔

سینیٹ میں حزب مخالف کی جماعت پاکستان تحریک انصاف کے سینیٹر ہمایوں مہمند نے بی بی سی کو بتایا کہ ان کی جماعت کے پانچ سینیٹرز کے پاس حکمراں اتحاد میں شامل جماعتوں کے ارکان آئے تھے اور انھوں نے بتایا تھا کہ وہ چاہتے ہیں کہ سینیٹ کو قومی اسمبلی کی طرح خود مختار بنایا جائے اس لیے وہ سینیٹ میں قرارداد لا نا چاہتے ہیں جس کی انھوں نے حامی بھر لی تھی اور اس قرارداد پر انھوں نے دستخط کردیے۔

ہمایوں مہمند کا کہنا تھا جب یہ بل سینیٹ میں پیش ہوا تو ان کی جماعت نے کسی اور معاملے پر ایوان سے بائیکاٹ کیا تھا اور اسی دوران قرارداد کی بجائے اس کو بل کی شکل میں پیش کیا گیا۔

انھوں نے کہا کہ واپس آکر انھوں نے اس پر اپنا احتجاج بھی ریکارڈ کروایا تھا۔

’چیئرمین کی تنخواہ دو لاکھ روپے، گھر کا ماہانہ کرایہ ڈھائی لاکھ روپے‘

ذرائع ابلاغ اور سوشل میڈیا پر اس بل کی سینیٹ سے منظوری کو شدید تنقید کا نشانہ بنایا جا رہا ہے۔ پروٹوکول کے مطابق چیئرمین سینیٹ صدر اور وزیر اعظم کے بعد تیسرے نمبر پر آتے ہیں۔

سینیٹ کے چیئرمین کی تنخواہ اور مراعات میں اضافے کے علاوہ ان کے تین سال کا عرصہ مکمل کرنے کے بعد عہدے سے سبکدوش ہونے سے متعلق جو بل سینیٹ سے منظور کروایا گیا ہے اس کے اہم نکات میں یہ بھی ہے کہ چیئرمین کی تنخواہ دو لاکھ پانچ ہزار روپے ہو گی اور چیئرمین جس گھر میں رہے گا اس کا ماہانہ کرایہ ڈھائی لاکھ روپے ہوگا اور اس کی تزیئن و آرائش پر پچاس لاکھ روپے سے زیادہ کا خرچہ نہیں ہوگا۔

اس بل میں یہ بھی کہا گیا ہے کہ اگر چیئرمین سینیٹ منتخب ہوتے وقت اگر ان کے پاس کوئی سرکاری رہائش گاہ نہیں ہے تو انھیں ایسے گھر میں رکھا جائے گا جس کا ماہانہ کرایہ پانچ لاکھ روپے سے زیادہ نہیں ہو گا۔

اس بل میں یہ بھی کہا گیا ہے کہ اگر چیئرمین سینیٹ اپنے ہی گھر میں رہ رہے ہیں تو انھیں سرکار کی طرف سے ڈھائی لاکھ روپے کرائے کی مد میں ادا کیے جائیں گے تاہم اس گھر کی تزیئن و آرائش پر اخراجات سرکاری خزانے سے ادا نہیں کیے جائیں گے۔

سینیٹ سے پاس ہونے والے اس بل میں یہ بھی کہا گیا ہے کہ اگر چیئرمین سینیٹ بیرون ملک دورے پر جائے گا تو ان کے لیے وفاقی اور صوبائی حکومتوں کے زیر استعمال جہازوں کے علاوہ مسلح افواج یا کسی فلائینگ کلب کا طیارہ حاصل کیا جائے گا۔

اس بل میں اس بات کا بھی ذکر ہے کہ اگر چیئرمین سینیٹ کے لیے کوئی طیارہ کرائے پر لیا جاتا ہے تو اس میں ان کے خاندان کے چار افراد ان کے ساتھ جا سکتے ہیں اور اگر چیئرمین سینیٹ کسی کمرشل فلائٹ سے بیرون ملک جاتے ہیں تو ان کے ساتھ ان کے ِخاندان کا ایک فرد ان کے ساتھ جاسکتا ہے جس کے اخراجات سرکاری خزانے سے ادا کیے جائیں گے۔