کھیرتھر نیشنل پارک میں تیل و گیس کی تلاش

کھیرتھر قومی پارک میں دو کنویں بنائے جائیں

کھیرتھر نیشنل پارک میں ڈرلنگ کرنے والی کمپنی پاکستان آئل فیلڈ لمیٹڈ کے مرکزی دفتر میں ٹیلیفون پر رابطہ کیا گیا تو اُنھوں نے کوئی تبصرہ نہیں کیا۔

تاہم ایک اہلکار نے بتایا کہ ’کام چل رہا ہے اور اس کو میچور ہونے میں پانچ سے سات ماہ لگ سکتے ہیں۔‘ جب ان سے کہا گیا کہ یہ تو محفوظ قرار دیا گیا پارک ہے تو اُنھوں نے مشورہ دیا کہ وزارت پیٹرولیم سے رابطہ کیا جائے۔

پاکستان آئل فیلڈ لمیٹڈ تیل اور گیس کی تلاش اور پیداوار کے علاوہ پیٹرولیم مصنوعات، ایل پی جی، سالوینٹ آئل اور سلفر بھی تیار کرتی ہے۔

کمپنی کی ویب سائٹ پر موجود سالانہ رپورٹ میں بتایا گیا ہے کہ کھیرتھر میں سائزمک سروے سے ہائیڈرو کاربن کی کھوج لگائی جائے گی جس کے لیے اُنھوں نے ڈرلنگ کی اجازت حاصل کر لی ہے۔

دوسری جانب سندھ کی محکمہ ماحولیات کی جانب سے اس ڈرلنگ کے اثرات پر رپورٹ میں بتایا گیا ہے کہ جنوبی بلاک میں دو کنویں کھودے جائیں گے۔

سندھ کے صوبائی وزیر جنگلات اور حیوانات تیمور تالپور اور صوبائی وزیر ماحولیات اسماعیل راہو سے ٹیلیفون پر رابطہ کیا گیا لیکن ان کا کوئی مؤقف سامنے نہیں آ سکا۔

فطرت کے تحفظ کی عالمی تنظیم (آئی یو سی این) کے نوید سومرو کہتے ہیں نیشنل پارک کی ماحولیاتی اہمیت ہوتی ہے اسی لیے ہی اس کو قومی پارک اور تحفظ دیا جاتا ہے۔ اُنھوں نے کہا کہ کھیرتھر میں کئی نایاب چرند و پرند ہیں جن میں سے بعض ایسی اقسام بھی ہیں جو معدومیت کے خطرے کی شکار ہیں۔‘

اس کے علاوہ اُن کا کہنا تھا کہ سندھ کی جو بڑی شہری آبادیاں ہیں مثلاً کراچی اور حیدرآباد، ان میں ماحولیاتی توازن کے لیے بھی اس پارک کی اہمیت ہے کیونکہ یہاں پر جنگلات موجود ہیں، اور جب ماحولیاتی تبدیلیاں واقع ہو رہی ہوں تو اس میں اس کا کردار اور بھی بڑھ جاتا ہے۔

’ڈرلنگ اور تحقیق کے لیے اجازت دینا ایک غیر قانونی اقدام ہے کیونکہ نیشنل پارک میں کسی بھی قسم کی ترقیاتی سرگرمی غیر قانونی ہے وہاں کان کنی کی اجازت نہیں دی جا سکتی، بلکہ وہاں تو سڑک کی تعمیر تک نہیں ہو سکتی۔ ایسی سرگرمیاں وائلڈ لائف کو متاثر کریں گی اور وہ وہاں سے نقل مکانی پر مجبور ہو جائیں گے۔

کھیرتھر کیوں اہم ہے؟

کھیرتھر نیشنل پارک تین لاکھ آٹھ ہزار 733 ہیکٹرز پر مشتمل پاکستان کا دوسرا بڑا قومی پارک ہے جہاں چرند اور پرند کو تحفظ حاصل ہے۔ یہ پارک کراچی سے 80 میل شمال میں کراچی اور جامشورو اضلاع کے پہاڑی سلسلے میں واقع ہے۔

کراچی یونیورسٹی کے سابق پروفیسر ظہیر خان کی ایک تحقیق کے مطابق کھیرتھر سندھی آئی بیکس، یوریل، چنکارا ہرن، انڈین لومڑی، پنگولین، جنگلی بلیوں، تیندوے، لگڑ بگھوں سمیت ممالیہ جانوروں کی 27 دیگر اقسام کا مسکن ہے اور رینگنے والے جانوروں کی مختلف نسلیں اور پرندوں کی کم از کم 58 اقسام یہاں پائی جاتی ہیں۔

یہ علاقہ چٹانوں، ریتیلے میدانوں پر مشتمل ہے جہاں پانی کے قدرتی تالاب اور قدرتی چراگاہیں موجود ہیں، بحریہ ٹاؤن کی تعمیر سے قبل یہ جانور اس علاقے میں بھی نظر آتے تھے۔

کھیرتھر کو سنہ 1974 میں سندھ محکمہ جنگلی حیات سندھ نے قومی پارک کا درجہ دیا تھا، جو پاکستان کے پہلے پارکوں میں سے ہے۔ سنہ 1975 میں اس کو اقوام متحدہ کی نیشنل پارکس کی فہرست میں شامل کیا گیا اور سنہ 1997 میں اقوام متحدہ کی چرند پرند کے محفوظ علاقوں کی فہرست میں بطور قومی پارک اس کی حیثیت کی توثیق کی گئی۔

کھیرتھر کا علاقہ تاریخی اہمیت کا بھی حامل ہے، جس میں دنیا کے سب سے بڑے قلعوں میں سے ایک رنی کوٹ اور آثار قدیمہ کے مقامات واقع ہیں جن کے بارے میں ماہرین کا اندازہ ہے کہ یہ 3500 قبل مسیح کے ہیں۔

کبھی سڑک تو کبھی ڈرل

کھیرتھر نیشنل پارک سنہ 1991 میں ایک مجوزہ شاہراہ کی تعمیر کی وجہ سے زیر بحث آیا تھا۔ جس پر ’شہری‘ نامی شہری حقوق کی تنظیم سمیت دیگر تنظیموں نے آواز بلند کی جس کے بعد اس سڑک کا رخ تبدیل کیا گیا۔

سنہ 1997 میں وفاقی حکومت نے کھیرتھر میں شیل کمپنی کو گیس کی تلاش اجازت دے دی جس کے خلاف شہری تنظیم نے ماحول کے بقا کے لیے کام کرنے والی تنظیموں کے ہمراہ مقامی اور بین الاقوامی سطح پر آواز بلند کی اور معاملہ ہائی کورٹ میں پہنچ گیا۔

’شہری‘ نامی تنظیم کی رضاکار عنبر بھائی بتاتی ہیں کہ مقامی اور بین الاقوامی دباؤ کی وجہ سے شیل کمپنی کو پیچھے ہٹ جانا پڑا تھا۔

’یہ پاکستان کا اعلانیہ نیشنل پارک ہے جس کے تحفظ کے لیے ہم دوبارہ ہر قدم اٹھائیں گے جو پہلے کرتے آئے ہیں، یہاں مائننگ اور ڈرلنگ کی اجازت نہیں دی جاسکتی۔